فنى وتشكيلى
تلفى مهما هاتلفى
مسيرك تانى هتجيلى
ينام دمعك على كفوفى
وتيجى ف حضنى تحكيلى
تقولى ده الزمن غادر
تقولى ده الشيطان شاطر
ومين غيرى هتشكيله ؟
هتيجى لاننى عارفك
سنين وايام وانا عزفك
جموحك ياما صديته
وشعرك ياما لميته
واقوللك عيشى ياسمرا
طموحك وانتى فاكرانى
ده جزء بسيط من الذكرى
وانتى ليه اكيد فاكرة
وبردضه بتتقلى وناكرة
براحتك
كل الحاجات والمحتاجات
والاسئله والاجوبه
جوه عيونك مهجتى
متوضحه ومتبوبه
وافضل انا مع رحلتك
عابر سبيل على سكتك
افضل هنا يمكن تبان
نجمايه من امنيتك
تسقط هنا على كوكبى
تطرح نهار وتنوره
تغزل من النور والامل
عالم فريد المحتوى
فيه الامل
انهار عسل
فيه الحنين مليان حنين
ولاعمره يوم يعرف انين
فيه الدفا للحيرانين
فيه الامان للمجروحين
فيه كام رغيف
سدوا حاجات المحرمين
عالم فريد المحتوى
فيه السلام عنوان كبير
وطيور تغنى ف عشها
والام تحضن ابنها
تسقيه حنان ترويه دفا
عالم فريد المحتوى
فيه الحاجات والمحتجات
والاسئله والاجوبه
فيه الامانى الطيبه
جوه عيونك مهجتى
كل الامانى الطيبه
